အမျက်တော်ကို အခွင့်ပေးပါ

ပြဿနာက တစ်ခုမပြီးသေးဘူး။ နောက်တစ်ခုထပ်တက်လာတဲ့အခါ ဘယ်လိုခံစားကြရမှာလဲ။

Covid 19 ဆိုတဲ့ ကမ္ဘာ့ကပ်ရောဂါကြီးရဲ့ ပြဿနာကမပြီး သေးဘူး။ အခု စစ်တပ်က မတရားအာဏာသိမ်းပြီး စစ်အာဏာရှင် စနစ်ကြီး တည်တံ့ခိုင်မြဲဖို့ လုပ်နေခြင်းဟာ မြန်မာပြည်ကြီးအတွက် နောက်ထပ်ပြဿနာတစ်ခု ထပ်ဆင့်လာခြင်းဖြစ်တယ်။

စိတ်ထဲမှာ ကျိန်မနိုင်ခဲမရ ဖြစ်နေကြမှာအမှန်ပါဘဲ။ ဒီလိုအချိန်မျိုးမှာ မတရားမှုက အမှန်တရားကို မတရား အနိုင်ယူတဲ့အခါမှ လူဟာ  မခံမရပ်နိုင်ဖြစ်ပြီး လူ့အမျက်ဟာ အလွယ်တကူထွက်လာတတ်ပါတယ်။ အဲဒီအခါမှာ ယုံကြည်သူတွေအနေနဲ့ ဘယ်လိုလုပ်ကြမှာလဲ ။ ယုံကြည်သူဘုရားသား

သမီးများအနေနဲ့ ဘုရားသခင်ရဲ့ နှုတ်ကပတ်တော်က သွန်သင်လမ်းပြတဲ့အတိုင်း ခွန်အားယူပြီး တုန့်ပြန်ဘို့ဘဲဖြစ်တယ်။ ဘုရားသခင်ရဲ့ နှုတ်ကပတ်တော်ကတိကို စွဲကိုင် အသက်ရှင်သွားတတ်ဖို့ဖြစ်တယ်။

(ရောမ ၁၂:၁၉-၂၁) ချစ်​သူ​တို့၊ သူ​တစ်​ပါး​သည် သင်​တို့​ကို ပြစ်​မှား​လျှင်၊ ကိုယ်​တိုင် အ​ပြစ်​ပြန်၍ မ​တုံ့​ကြ​နှင့်။ အ​မျက်​တော်​ကို အ​ခွင့်​ပေး​ကြ​လော့။ ကျမ်း​စာ​လာ​သည်​ကား၊ ငါ​သည် အ​ပြစ်​တ​ရား​ကို စီ​ရင်​ပိုင်၏။ အ​ပြစ်​နှင့်​အ​လျောက် ငါ​ဆပ်​ပေး​မည်​ဟု ထာ​ဝ​ရ​ဘု​ရား​မိန့်​တော်​မူ၏။- ထို​ကြောင့် သင်၏​ရန်​သူ​သည် မွတ်​သိပ်​လျှင် လုပ်​ကျွေး​လော့။ ရေ​ငတ်​လျှင် သောက်​စ​ရာ​ဖို့​ပေး​လော့။ ထို​သို့​ပြု​လျှင်။ သူ၏​ခေါင်း​ပေါ်၌ မီး​ခဲ​ကို​ပုံ​ထား​လိမ့်​မည်။- အ​ဆိုး​အား​ဖြင့် အ​ရှုံး​မ​ခံ​နှင့် အ​ကောင်း​အား​ဖြင့် အ​ဆိုး​ကို​နိုင်​လော့။

နှုတ်ကပတ်တော်ကသွန်သင်ထားတာက  ပြစ်မှားခံရတဲ့အခါမှာ အပြစ်နဲ့ ပြန်ပြီး မတုံ့ပြန်ကြဖို့ သတိပေးထားပါတယ်။ အပြစ်နဲ့ ပြန်မတုံ့ဘဲ ကိုယ်ကလည်း လူ့အမျက်ကို ထိန်းချုပ်ပြီး ဘုရားသခင်ဆီကို ဆုတောင်းအပ်နှံရင်း ပြစ်မှားလာတဲ့သူကို ဘုရားသခင်ရဲ့အမျက်တော်အတွက် ဘဲ အခွင့်ပေးလိုက်ဖို့ဖြစ်တယ်။ အဆိုးကို အဆိုးနဲ့ မတုန့်ပြန်ဘဲ အကောင်းနဲ့ဘဲ တုန့်ပြန်ပြီး အကောင်းအားဖြင့် အဆိုးကို အနိုင်ယူဖို့ဖြစ်တယ်။ အကောင်းအားဖြင့် အနိုင်ယူဖို့ရာကတော့ ဖြစ်ပျက်သမျှအားလုံး ဘုရားသခင်လက်ထဲကို အပ်နှံလိုက်ဖို့ဘဲ ဖြစ်တယ်။ ဘုရားသခင်ရဲ့လက်ထဲကို အပ်နှံတဲ့အခါ ဘုရားသခင်က သူ့ခေါင်းပေါ်မှာ မီးခဲပုံထားလိမ့်မယ်ဆိုတဲ့အတိုင်း သူ့အပြစ်ကို သူတာဝန်ယူသွားရမှာဖြစ်တယ်။

ဆာလံ ဆရာကတော့ ဘယ်လိုပြောခဲ့လည်းဆိုရင် (ဆာလံ ၇:၁၀-၁၁) သ​ဘော​ဖြောင့်​သော​သူ​တို့​ကို ကယ်​တင်​တတ်​သော ဘု​ရား​သ​ခင်​သည် ငါ၏​အ​ကွယ်​အ​ကာ ဖြစ်​တော်​မူ၏။ ဘု​ရား​သ​ခင်​သည် တ​ရား​သ​ဖြင့်​စီ​ရင်​သော​ဘု​ရား​ဖြစ်၍၊ မ​တ​ရား​သော​သူ​ကို အ​စဉ်​အ​မျက်​ထွက်​တော်​မူ၏။

ဘုရားသခင်ကို ယုံကြည်အားကိုးတဲ့ သူအတွက်တော့ ဘုရားသခင်ဟာ အကွယ်အကာဖြစ်ပါတယ်။

သခင်ယေရှုခရစ်တော်အားဖြင့် ဖြောင့်မတ်ခြင်းကို ခံစားထားရတဲ့ ယုံကြည်သူဟာ ဘုရားသခင်ဆီမှာ ဘဲ ကွယ်ကာမှုကို ရယူကြရပါမယ်။ ဘုရားသခင်က တရားသဖြင့် စီရင်မယ်ဆိုတာကို နားလည်ပြီး ဘုရားသခင်ရဲ့ လက်တော်ထဲကို ဘဲ အဖြစ်အပျက်အားလုံးကို ပြောဆိုအပ်နှံလိုက်ဖို့ဘဲဖြစ်ပါတယ်။

(ယောဘ ၂၁:၂၈-၃၀) အာ​ဏာ​ထား​တတ်​သော​သူ၏​အိမ်​သည် အ​ဘယ်​မှာ​ရှိ​သ​နည်း။ မ​တ​ရား​သော​သူ​တို့၏ ဘုံ​ဗိ​မာန်​တို့​သည် အ​ဘယ်​မှာ​ရှိ​သ​နည်း​ဟု သင်​တို့​သည် ဆို​ကြ​လိမ့်​မည်။ ခ​ရီး​သွား​သော​သူ​တို့​ကို မ​မေး​ကြ​ဖူး​သ​လော။ ဖျက်​ဆီး​ရာ​နေ့​ရက်​ကာ​လ​ဖို့ မ​တ​ရား​သော​သူ​တို့​သည် ယ​ခု​ဘေး​လွတ်​လိမ့်​မည်​အ​ကြောင်း၊ ဒေါ​သ​အ​မျက်​ခံ​ရာ နေ့​ရက်​ကာ​လ​ဖို့ ယ​ခု​ထွက်​မြောက်​လိမ့်​မည် အ​ကြောင်း​တည်း​ဟူ​သော သူ​တို့​လ​က္ခ​ဏာ​သက်​သေ​များ​ကို မ​သိ​ကြ​သ​လော။ 

မတရားတဲ့သူတွေ၊ အာဏာကို အစိုးတရလုပ်တဲ့သူတွေ နဲ့ပတ်သက်ပြီး ဘုရားသခင်ရဲ့ နှုတ်ကပတ်တော်က သူတို့ရဲ့ အဆုံးနဲ့ပတ်သက်ပြီး မေးခွန်းမေးထားတာဖြစ်တယ်။ သူတို့နေစရာတောင်မှ ဘယ်မှာလဲ ဆိုတာ မသိနိုင်တော့တဲ့ အခြေအနေမျိုးဖြစ်သွားလိမ့်မယ်။အခုသူတို့ဟာ ဘာမှ စီရင်မခံရသလိုမျိုး လွတ်မြောက်နေပေမဲ့ ဘုရားသခင်ရဲ့ ဖျက်ဆီးရာနေ့ရက်၊ ဒေါသအမျက်ခံရာ နေရက် အမှန်တကယ်ရောက်လာလိမ့်မှာ ဖြစ်တယ်။

(တရားသူကြီး မှတ်စာ  ၁:၅-၇) ထဲမှာ အဒေါနိဗေဇက် မင်းအကြောင်းကို တွေ့ရတယ်။ သူဟာ အရင်က သူအာဏာထားပြီး အနိုင်ရတုံးက မင်းကြီး (၇၀) ရဲ့ လက်မ၊ ခြေမ တွေကို ဖြတ်ဘူးခဲ့တယ်။ သူနောက်ပိုင်း ယုဒလူတွေရဲ့ လက်ထဲမှာ အရှုံးခံရတဲ့အခါမှာ မင်းကြီး (၇၀) ကို လုပ်ခဲ့သလိုမျိုး သူလည်း တဖန်ပြန်ပြီး ခံရပြီး နောက် ယေရုရှလင်မြို့ကိုပို့ပြီး အဲဒီမြို့မှာ သေသွားရတယ်။

လူဟာ အာဏာကို အမြဲဆုပ်ကိုင်ထားနိုင်ခြင်း၊ ဘယ်တော့မှ မရှုံးတော့ဘူးလို့ မှတ်ယူလို့မရပါဘူး။ နှုတ်ကပတ်တော်မှာ ဖော်ပြထားတဲ့ ဒီအကြောင်းအရာတွေဟာ ယုံကြည်သူတွေအနေနဲ့  သတိထားဆင်ခြင်ပြီး အသက်တာကို လျှောက်လှမ်းကြဖို့ဖြစ်တယ်။ အဆုံးတနေ့မှာ  မတရားတဲ့သူတွေဟာ သူတို့လုပ်ခဲ့သလို ပြန်ခံစားရမှာ ဖြစ်တယ်။ အဒေါနိဇေဒက် မသေခင် ဘာပြောခဲ့သလဲဆိုရင် (တရားသူကြီး ၁:၇) မှာ ငါပြုဘူးသည့်အတိုင်း ဘုရားသခင်သည် ငါ၌ အပြစ်ပေးတော်မူပြီ လို့ ဆိုခဲ့ရပါတယ်။

အဲဒီတော့ ကျွန်တော်တို့ ဟာ မတရားပြုနေတာကို တွေ့နေမြင်နေ ခံစားနေရပေမဲ့ အခုအချိန်မှာ ဘုရားသခင်ရှေ့တော်မှာ ငြိမ်ဝပ်စွာ နေဘို့ဘဲဖြစ်တယ်။

(ဆာလံ ၄၆:၁၀) ငြိမ်​ဝပ်​လျက်​နေ​ကြ​လော့။ ငါ​ကား ဘု​ရား​သ​ခင်​ဖြစ်​သည်​ဟု သိ​မှတ်​ကြ​လော့။ လူ​မျိုး​တို့​တွင် ငါ​သည် ဘုန်း​ပွင့်​မည်။ မြေ​ကြီး​ပေါ်​မှာ ဘုန်း​ပွင့်​မည်။ 

ငြိမ်ဝပ်စွာနေပြီး ဘာလုပ်ရမှာလဲ။ မြန်မာပြည်မှာရှိတဲ့ လူအမျိုးမျိုးအတွက် ဆုတောင်းရမှာ ဖြစ်တယ်။ လူမျိုးတိုင်းမှာ ဘုရားသခင်ရဲ့ ဘုန်းတော်ထင်ရှားဖို့ တောင်းရမှာ ဖြစ်တယ်။ ဘုရားသခင်ရဲ့ ဖန်ဆင်းခြင်းလက်ရာများ အားလုံးကို ကြည့်ရင် ဘုရားသခင်ရဲ့ ဘုန်းတော်ထင်ရှားဖို့ဘဲ ဖြစ်ပါတယ်။

အခုအချိန်မှာ ကျွန်တော်တို့ အဓိက ဉီးစားပေးလုပ်သွားရမယ့်အရာကတော့ (၁တိ ၂:၁-၂) ဆိုထားတဲ့အတိုင်း ငါ​တို့​သည် ဘု​ရား​ဝတ်၌ မွေ့​လျော်​ခြင်း၊ လျောက်​ပတ်​စွာ ကျင့်​ခြင်း​အ​မျိုး​မျိုး​ကို​ပြု၍၊- ငြိမ်​ဝပ်​ဆိတ်​ညံ​စွာ နေ​ရ​မည်​အ​ကြောင်း၊ ရှင်​ဘု​ရင်​မှ​စ၍ မင်း​အာ​ဏာ​ရှိ​သော သူ​အ​ပေါင်း​တို့​နှင့် လူ​အ​မျိုး​မျိုး​တို့​အ​ဖို့ ဆု​တောင်း​ပ​တ္ထ​နာ​ပြု​ခြင်း၊ မေ​တ္တာ​ပို့​ခြင်း၊ ကျေး​ဇူး​တော်​ကို ချီး​မွမ်း​ခြင်း​ကို ရှေ့​ဦး​စွ​ပြု​စေ​ခြင်း​ငှာ ငါ​တိုက်​တွန်း သွေး​ဆောင်၏။

ဆုတောင်းခြင်းပြုရမယ်။ မေတ္တာပို့ခြင်းပြုရမယ်။ ကျေးဇူးတော်ချီးမွမ်းခြင်း    အားဖြင့် ဘုရားသခင်ဆီကို အရာအားလုံး အပ်နှံလိုက်ဖို့ဖြစ်တယ်။ ဘုရားသခင်ဆီကို အပ်နှံလိုက်ပြီးတဲ့အခါ၊ ဘုရားသခင်က ဘယ်လိုကယ်တင်ခြင်းပြုလာမလဲ၊ ဘယ်လိုစီရင်ခြင်းပြုသွားမှာလဲ၊ မတရားတဲ့ သူတွေအပေါ်မှာ ဘုရားသခင်ရဲ့ အမျက်တော် ဘယ်လို သက်ရောက်လာမှာလဲ ဆိုတာ စောင့်မျှော်ဖို့ဘဲ ဖြစ်ပါတယ်။

ဒီနေ့ ဆင်ခြင်ခဲ့တဲ့ နှုတ်ကပတ်တော်အားဖြင့် အားလုံး အပေါ် ဘုရားသခင် အသစ်တဖန်ကောင်းကြီးပေးပါစေ။ (အာမင်)

ဆရာစောအယ်စိုး